Gr. 1

Við heimild í § 2 í kunngerð um bygningskunngerð 2017 og við góðkenning frá lands-stýrisfólkinum í byggimálum verður gjørd henda reglugerð um gjøld fyri byggimálsviðgerð hjá Sørvágs Kommunu.

Gr. 2

Reglugerðin er galdandi fyri gjøld fyri byggiloyvi, fyribilsloyvi og fyri at viðgera frávik sambært bygningsreglugerðini ella øðrum galdandi ásetingum fyri bygging.

Gr. 3

Gjald verður bert kravt fyri byggimálsviðgerð, sum krevur uttanhýsis ráðgeving.

Gr. 4

Gjaldið verður ásett sambært kostnaðarmeting/tilboði frá uttanhýsis tekniskum ráðgeva + 10% av metingini/tilboðnum fyri umsitingarliga viðgerð hjá kommununi - ella sambært endaligari rokning frá ráðgeva.

Hetta er galdandi fyri alla bygging, sum lýst er í § 2, stk. 3, í kunngerð um bygningskunngerð 2017.

Gr. 5

Gjaldið fellur til gjaldingar, tá ið byggiloyvið, fyribilsloyvið ella fráviksloyvi er klárt at lata.

Gr. 6

Kommunali byggimyndugleikin kann halda byggiloyvi, fyribilsloyvi ella fráviksloyvi aftur, til gjaldið er goldið.

Gr. 7

Avgerðir, sum kommunali byggimyndugleikin hevur tikið við heimild í ásetingum í hesi reglugerð, kunnu kærast til Føroya Kærustovn sambært § 19 í byggilógini – løgtingslóg nr. 60 frá 15. mai 2012.

Sørvágs Kommuna, 24. september 2025