Sjey næmingar lokið prógv í føroyskum sum annaðmál

20. juni 2024

Mikukvøldið fingu sjey næmingar í Sørvágs og Vága kommunu prógv í føroyskum sum annaðmál.

Í hesum sambandi varð skipað fyri serligari hátíðarløtu í skúlanum í Sørvági, har prógvini vórðu handað. Tríggir næmingar vóru burturstaddir, men hinir fýra fingu prógvini.

Føroyskt sum annaðmál er fyri tilflytarar og útbúgving í fleiri stigum. Tríggir næmingar hava staðið støðuroyndina. Tað merkir, at hesir næmingar hava lokið øll stig í útbúgvingini. Hinir næmingarnir hava staðið stigroyndir.

Eyð Ellingsgaard, borgarstjóri í Sørvágs kommunu, og Bjarni Prior, borgarstjóri í Vága kommunu, handaðu prógvini til næmingarnar, sum hava staðið støðuroyndina.

Fyrimyndarligt samstarv

Seinastu trý árini hava kommunurnar í Vágum samstarvað við Tórshavnar kommunu og Tórshavnar kvøldskúla um undirvísingina í føroyskum sum annaðmál. Men eftir summarfrítíðina verður undirvísingin ein landsuppgáva, sum Undirvísingarstýrið fer at umsita, og í løtuni er ógreitt, hvussu undirvísingin verður skipað frameftir.

Borgarstjórarnir í Vágum eru á einum máli um, at talan hevur verið um eitt fyrimyndarligt samstarv og vóna, at landsmyndugleikarnir fara at raðfesta og halda fram við undirvísingini í Vágum.

– Tað er stórur tørvur á undirvísing í føroyskum sum annaðmál, og grundarlag er fyri at halda fram í Vágum, siga borgarstjórarnir.

Eyð Ellingsgaard og Bjarni Prior vísa á týdningin, sum undirvísingin hevur, tí málið er lykilin til luttøku í samfelagnum, siga tey.

Sørvágs kommuna ynskir næmingunum hjartaliga til lukku við próvnum og blíðan byr framyvir.

Onnur tíðindi

Nýtt graslíki á Dungasand

16. juli 2024

Syngið við kvøld umborð á Westward Ho!

04. juli 2024

Nýtt Sjósavn og Mentanar­hús í Sørvági 

02. juli 2024